Presidenti i Shqipërisë Ilir Meta ka bërë homazhe në nder të familjes Jashari.
Përmes një mesazhi në “Facebook”, kreu i shtetit tha se Adem Jashari dhe familjarët e tij dëshmuan sakrificën më sublime për lirinë e Kosovës dhe të shqiptarëve, kudo ata jetojnë.
Ai shtoi se gjaku i dëshmorëve qëndron në themel të të ardhmes europiane të vendit tonë.
“Mirënjohje përjetë dhe nderimin më të lartë për sakrificën sublime të Komandantit legjendar të Ushtrisë Çlirimtare të Kosovës, Adem Jashari dhe familjes Jashari, që frymëzon kombin në çdo kohë për mbështetje të palëkundur të lirisë dhe pavarësisë së Kosovës. Në themelet e shtetit të Kosovës qëndron gjaku i bijve dhe bijave më të mirë të kombit, që ashtu si Jasharët e Drenicës martire 23 vjet më parë, i treguan mbarë botës se çfarë çmimi ka liria për shqiptarët. Të ardhmen e sigurtë europiane kombi ynë do t’ja dalë ta ndërtojë mbështetur mbi sakrificat e Dëshmorëve dhe mbrojtjes së vlerave më të larta që trashëgojmë!”
