Meloni kundër marrëveshjes Trump-Putin për gazin rus: E rrezikshme për Europën
Kryeministrja italiane, Giorgia Meloni, ka kërkuar një përgjigje të shpejtë dhe të koordinuar nga vendet europiane për çështjen e energjisë, duke paralajmëruar se kostot e larta po dëmtojnë ekonominë dhe konkurrueshmërinë e bizneseve. Gjatë fjalës së saj në Senatin italian, në prag të Samitit Europian të 15 dhe 16 tetorit, Meloni theksoi se asnjë shtet nuk mund ta përballojë i vetëm këtë sfidë.
Sipas saj, çmimi i energjisë është aktualisht një nga problemet kryesore për ekonominë italiane. Meloni paralajmëroi gjithashtu se rregullat europiane nuk duhet ta përkeqësojnë krizën, ndërsa nënvizoi se çdo kosto shtesë e vendosur nga Europa mund të favorizojë konkurrentët e saj në tregjet ndërkombëtare.
Kryeministrja italiane shprehu gjithashtu rezerva të forta për marrëveshjen e fundit Trump-Putin për shitjen e gazit rus, të njoftuar sipas saj të premten e kaluar. Meloni e cilësoi këtë zhvillim si një zgjedhje veçanërisht të rrezikshme, duke vënë në pikëpyetje përfitimet e saj dhe duke paralajmëruar për pasojat politike dhe ekonomike.
Sipas Melonit, rritja e çmimeve të karburanteve lidhet kryesisht me luftën në Iran dhe jo me konfliktin në Ukrainë. Ajo paralajmëroi se marrëveshja mund të sjellë të ardhura të reja për Moskën për financimin e luftës, ndërsa do të dobësonte efektin e sanksioneve perëndimore ndaj Rusisë.
“Legjitimimi i Moskës, ndërsa bombat e saj vazhdojnë të bien mbi qytetet ukrainase”, tha Meloni, duke theksuar se marrëveshja ngre pikëpyetje mbi përpjekjet e deritanishme të vendeve perëndimore, përfshirë Shtetet e Bashkuara, për ta detyruar Vladimir Putinin të ulet në tryezën e negociatave.
/vizionplus.tv
