Pas ish-ministres Klajda Gjosha, edhe ish-deputetja e LSI, Kejdi Mehmetaj u “rreshtua” në krah të presidentit Ilir Meta dhe nuk kurseu akuzat për kryeministrin Edi Rama. Ajo tha në “Facebook” se Rama këtë të enjte tentoi të manipulonte qëndrimet e Metës për negociatat.
“E trembur deri në palcë nga qindra mijëra shqiptarët që manifestuan të vendosur për ta mbrojtur me çdo kusht të ardhmen demokratike të vendit tonë e duke planifikuar se si do i mashtrojnë shqiptarët për dështimin e rradhës në hapjen e negociatave, banda qeverisëse tentoi sot të manipulonte qëndrimet e Presidentit. E ndërsa lexoja me vëmendje letrën e publikuar nga Presidenti i Republikës drejtuar Komisionerit Vàrhelyi më lindi kjo pyetje: Halli i madh i Ramës është të justifikojë veten përpara shqiptarëve për moshapjen e negociatave dhe shtimin e kushteve të reja, apo se Komisioni po informohet mbi mashtrimet e mëdha që qeveria e tij ka bërë lidhur me Gjykatën Kushtetuese dhe tentativat e panumërta për ta kapur atë e për ta kthyer në një tjetër vegël që i shërben regjimit diktatorialo-Ramist?”
Kejdi Mehmetaj shtoi se qytetarët e kanë marrë vendimin e tyre dhe kjo u duk qartë në 2 mars. Ky reagim erdhi pas akuzave të Edi Ramës se Ilir Meta po punon që Shqipërisë të mos i hapen negociatat.
