Është shoqëruar me tension dhe përplasje fizike me policinë protesta e banorëve të fshatit Lumas në Kuçovë.
Nga përleshja u lënduan katër banorë, dy prej të cilëve u dërguan për ndihmë mjekësore drejt spitalit.
“Më dhunuan, më vendosën poshtë dhe më goditën policat.”
Prej afro 20 ditësh, banorët e kësaj zone kanë bllokuar rrugën duke mos lejuar mjetet e firmës private që të nisë punimet për ndërtimin e ujësjellësit të ri në burimin e Sinecit. Ata e kundërshtojnë projektin e bashkisë pasi uji përdoret nga disa fshatra për vaditjen e tokave bujqësore.
“Kërkojmë një të drejtën tonë se ushqehemi me këtë pasuri. Ai burim është krijuar nga perëndia. Ka dalë në sipërfaqe dhe nuk duhet ta fusim në dhe prapë. Iku koha e Enver Hoxhës, iku zotërinj. I bëj thirrje policisë se është zonë e mbrojtur në kategorinë e tretë.”
Banorët u përplasën fizikisht me policinë edhe ditën e premte. Ata thanë se lidhur me këtë episode dhune kanë bërë denoncim në prokurori.
“Kam ndenjur dy ditë shtrirë vajta në prokurori ja tregova prokurorit. Na shtinë me shqelma sikur të ishim plehra.”
Lidhur me këtë problem, Vizion Plus iu drejtua Bashkisë së Kuçovës, e cila thotë se banorët do të kenë mundësi të vaditin tokat edhe pas përfundimit të ujësjellësit.
Nga projekti, sipas autoriteteve, do furnizohen me ujë të pijshëm shtatë fshatra. Ndërkohë banorët kërkojnë pezullimin e punimeve deri në momentin që gjykata do japë vendimin e saj për këtë çështje.
