Çështja e McGonigal vijon të sjellë akuza dhe përplasje në klasën politike të vendit.
Grupimi i Alibeajt do të ketë në seancën e sotme interpelancë me kryeministrin Edi Rama, ndërsa njëzëri demokratët e quajnë këtë si çështje më korruptive të të gjitha kohërave.
Ish deputeti i PD Gert Bogdani në një intervistë për emisionin 7pa5 në Vizion Plus ka deklaruar se “McGonigal” duhet të hetohet nga drejtësia shqiptare, e cila sipas tij deri tani është “në gjumë”.
Sipas tij, SPAK duhet t’i “kërkojë llogari” kryeministrit se ku i gjeti paratë, për çfarë e përdori dhe sa thellë shkojnë ato në korrupsionin e zyrtarëve ndërkombëtarë.
“Drejtësia shqiptare fle gjumë edhe pse lajme të tilla si kjo kanë marrë hapësira në mediat botërore. Nuk besoj se duhet të vazhdojë kështu. Ka një nismë të PD për të filluar një hetim për këtë çështje.
Besoj dhe duhet të fillojë një hetim nga organet e drejtësisë shqipatre se ku u gjetën këto para, për çfarë u përdorën dhe sa thellë shkojnë këto para”, tha Bogdani.
Ish kandidati i Primareve për Bashkinë e Tiranës, më tej shtoi se Rama, duhet të kishte lajmëruar ambasadën amerikane për takimin që do të zhvillonte me ish agjentin e FBI-së, teksa shton se afera për puset e naftës duhet hetuar nëse ka fitim dhe përfshirje të rusëve në Shqipëri.
“Për takime të zyrytarëve të lartë, kryeministri duhet të lajmëronte ambasadën amerikane dhe është në dorë të ambasadës nëse do dërgonte një njeri apo jo. Aferat për puset e naftës që diskutohen duhen hetuar nëse ka fitime të drejtpërdrejta dhe nëse ka në mënyrë të drejtpërdrejtë ose jo të përfshirë oligarkë rusë. Çështja në amerikë është bërë shumë politike dhe duhet të bëhet edhe në Shqipëri. Në situatën aktuale ndikimi rus duhet hetuar”, tha Bogdani.
Ai theksoi më tej se Rama duhet të japë llogari sot para deputetëve, ndërsa protestën e sheh si mjetin e domosdoshëm përballë këtij skandali.
“Interpelanca është shumë e rëndësishme dhe kryeministri duhet të jetë të jap përgjigje se duhet ti ketë kaluar grip. Një komision hetimor, pse jo. Nuk e di se sa do ishte efikas. Protesta është shumë e rëndësishme sepse është një skandal, ku korrupsioni jonë shkon përtej oqeanit dhe korrupton partnerin tonë strategjik”, tha Bogdani.
Sipas tij, PD është goditur padrejtësisht nga ndërkombëtarët dhe kjo ka ardhur si pasojë e korrupsionit të lartë të qeverisë shqiptare.
