Edhe tre fabrika të tjera të përpunimit të mishit kanë pezulluar punën në Brazil, ndërsa vazhdojnë hetimet për skandalin e mishit të kalbur, që është eksportuar në shumë vende të botës.
21 fabrika kanë përdorur kimikate për të fshehur erën e mishit dhe kanë korruptuar inspektorë të shëndetësisë për të garantuar se produktet e tyre ishin të sigurta.
BE ka vendosur një ndalim të pjesshëm të eksportit të produkteve të mishit nga 21 fabrikat që paketojnë. 6 prej tyre janë mbyllur përkohësisht dhe po hetohen nga policia dhe autoritetet e Shëndetësisë.
15 të tjerat nuk lejohet të eksportojnë, ndonëse mund të prodhojnë për tregun vendas. Ndërkaq, grupe fermerësh nga Europa dhe SHBA kanë kërkuar masa të ashpra ndaj mishit brazilian. Autoritetet amerikane po kryejnë analiza të mishit të importuar më parë.
Brazili është eksportuesi më i madh i mishit në botë dhe këto zhvillime po i shkaktojnë humbje të mëdha në ekonomi. Komisioneri europian për Shëndetin dhe sigurinë ushqimore Vytenis Andriukaitis ndodhet në kryeqytetin Brazilia, ku theksoi se synimi është që të ndihmohet vendi për të rikthyer besimin e konsumatorëve. Ai nuk ka bërë të ditura masat që do të merren ditët e ardhshme, por do të takohet me ministrin e Bujqësisë, Blairo Maggi.
Ndërkaq, Kina një nga vendet që ndaloi importin e ka hequr bllokadën dhe qeveria braziliane shpreson se edhe vende të tjera që kanë ndaluar importin do të bëjnë të njëjtën gjë.
