Deputetja Senida Mesi ka dhënë detaje nga takimi që kryeministri Rama zhvilloi në Velipojë me Këshillin Koordinues të veriut.
Në një deklaratë për mediat, Mesi tha se në mbledhje u diskutua në lidhje me problematikat dhe vendimmarrjet e rëndësishme duke filluar nga ato të kryebashkiakëve,
“Ishte mbledhje rutinë nën lidershipin e kryeministrit që është njëkohësisht edhe kryetar i Komunitetit drejtues për veriun. U diskutuan problematikat dhe vendimmarrjet e rëndësishme duke filluar nga kryetarët e bashkive. Vlerësimi i përformancës, vlerësimi i buxhetit, vlerësimi i shërbimeve qe janë formuar apo duhet të ofrohen në bashkitë tashmë rishtazi të krijuar, sigurisht me përjashtimin e bashkisë së Shkodrës.”
E pyetur nga gazetarët në lidhje me ngërçin e krijuar në Bashkinë e Shkodrës dhe nëse do e marrë ajo postin e kryebashkiakes, Mesi e mohoi kategorikisht këtë gjë duke theksuar se një temë e tillë nuk është prekur fare në mbledhjen e Këshillit Koordinues të veriut.
“Në këtë mbledhje nuk është diskutuar as ngërçi dhe as problematika në lidhje me kryetarin e bashkisë Shkodër. Bëhet fjalë për disa qarqe si Lezha, Kukësi, Dibra, të cilët diskutojnë disa problematika. U diskutua edhe elementi i dytë, që është elementi i organizmit të PS, që të jemi sa më pranë komuniteteve, që të zgjerojmë partinë me persona që duan të aderojnë në parti.”
