Orët kalojnë dhe bilanci i luftës së përgjakshme mes Izraelit dhe Hamasit sa vjen e rritet.
Të paktën 4150 persona kanë mbetur të vdekur dhe më shumë se 11.000 të tjerë janë plagosur. Situata paraqitet e rendë në spitalet e Gazës, ku zyra humanitare e OKB-së ka paralajmëruar se rezervat e fundit pritet të mbarojnë brenda disa orësh, duke vënë në rrezik jetën e mijëra pacientëve.
E ndërsa Gaza vijon të mbetet e rrethuar, autoritetet i kanë bërë thirrje faktorit ndërkombëtar për dërgimin e punonjësve shëndetësore vullnetare, por deri më tani nuk është ndërmarr asnjë hap. Jo vetëm kaq pasi edhe rezervat ushqimore, uji dhe energjia elektrike janë drejt fundit, pasi Izraeli ka siguruar vetëm 20 % të nevojave të Gazës për ujë.
Mediat raportojnë se më shumë se 1000 palestinezë kanë mbetur nën rrënojat e banesave të shkatërruara, e ndërsa po kërkohet për gjetjen e trupave të tyre.
Në rritjen e tensioneve mes dy vendeve ushtria izraelite ka urdhëruar që banorët që jetojnë në 28 komunitetet afër Libanit të evakuohen.
Po ashtu dhjetëra persona janë arrestuar nga autoritetet izraelite në Bregun Perëndimor gjatë natës.
Qytetarët janë mbledhur në vendkalimin e Rafah të Egjiptit për ti shpëtuar luftës,por deri më tani kjo pikë vijon të mbetet e mbyllur.
Afro 500.000 persona janë strehuar në shkolla dhe në ndërtesa të tjera në mbarë territorin. Izraeli ka deklaruar se nuk do të heqë dorë nga vendimi për rrethimin e Gazës , derisa militantët e Hamas do të lirojnë të gjitha pengjet.
Po ashtu Ushtria izraelite ka akuzuar drejtpërdrejt Teheranin se fshihet pas sulmeve me raketa nga grupi militant Hezbollah, në veri të vendit.
Së fundmi presidenti i SHBA-ve Joe Biden e ka quajtur një gabim pushtimin e Gazës nga Izraeli duke theksuar se grupi militant i Hamasit nuk përfaqëson të gjithë popullin palestinez. Ndërkohë sekretari amerikan i Shtetit Anthony Blinken, pritet të vizitoj sot Izraelin, ku do të takohet me kryeministrin Netanyahu.
Pas tij të martën do të shkoj edhe kancelari gjerman Olaf Scholz.
