Policia ka vënë në pranga një 31-vjeçar të shpallur në kërkim për tentativë vrasjeje.
Policia njofton se ai u arrestua në një lokal në Laç, teksa ishte edhe i armatosur.
31-vjeçari, Amarildo Ndreca ( Kola ), dhe dy persona të tjerë, në mars 2024, tentuan të vrisnin në fshatin Rrilë, shtetasin A. P.
“Si rezultat, në një lokal në Laç, është vënë në pranga shtetasi A. N. alias A. K., 31 vjeç. Gjykata e Lezhës i kishte caktuar masën e sigurisë “Arrest në burg”, në mungesë, për veprat penale “Vrasja me paramendim”, mbetur në tentativë, kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit “. Ky shtetas akuzohet se në bashkëpunim me shtetasit K. N. dhe V. T., ka tentuar të vrasë me armë zjarri, në fshatin Rrilë, më datë 06.03.2024, shtetasin A. P..
Nga kontrolli fizik i kryer në momentin e ndalimit, 31-vjeçarit iu gjet 1 armë zjarri pistoletë me municion luftarak, ndërsa gjatë kontrollit në lokalin ku u kap ai, u gjet një pjatë me mbetje të dyshuara të lëndës narkotike Kokainë”, njofton policia.
Po ashtu ka nisur procedimi në gjendje të lirë edhe për 6 persona që e shoqëronin në lokal të arrestuarin./vizionplus.tv
