Maqedoni, negociata për postet qeveritare

Mandatari për krijimin e qeverisë në Maqedoni Zoran Zaev u takua këtë të premte me liderin e BDI, Ali Ahmeti për të diskutuar për kabinetin e ri. Pas takimit të zhvilluar në selinë e LSDM, që zgjati dy orë, Ahmeti nuk pranoi te jepte detaje për median. Në një deklaratë të përbashkët të partive theksohet se dy forcat diskutuan mbi parimet e bashkëpunimit dhe në takimet e ardhshme edhe me partitë që dhanë mbështetje për formimin e qeverisë do të bisedohet konkretisht për ndarjen e posteve ministrore. Javën e ardhshme priten takime me aleancën për shqiptarët, ndërsa lëvizja Besa nuk ka marrë ende vendim për t’u bërë pjesë e qeverisë. Sipas mediave, Zaev pritet t’u ofrojnë aleateve te tij shqiptare 8 ose 9 ministri dhe dy poste zv/ministrash, qe do te ndahen sipas fuqisë se votave. Pritet që Radmilla Sheqerinska të mbajë postin e Ministres se Mbrojtjes, ndërsa Teuta Arifi nga BDI, përflitet për postin e Ministres së Jashtme.