Në pjesën e tretë të emisionit Real Story debati u përqendrua tek zhvillimi ekonomik.
Kryeministri Rama premtoi se rritja ekonomike nga 4% që është tani do të shkojë 5%. Ai shtoi se nga tani e deri në fund mandati, gjithçka do të fokusohet tek ndërtimi i rrugeve me standarte dhe jo si në kohën e Berishës.
“Ne do ta çojmë rritjen ekonomike mbi 5% dhe këtë gjë me konfirmimin e Bankës Botërore dhe FMN. Rruga e Pogradecit është e vetmja rrugë që ka firmën tonë. Ama tek rrugët s’keni parë ende asgjë akoma. Do shikoni pjesën e Unazës së Tiranës, pjesën e Milotit e kemi qarë, ndërsa Rrugën e Arbrit do e mbyllim brenda këtij mandati. Po kështu do të ndodhë edhe me Bypass-et e Fierit dhe Vlorës dhe akse të tjera si Kardhiq-Delvinë, Thumane-Vorë etj. Do fokusohemi fuqishëm në infrastrukture”.
Rama shtoi se godina e Teatrit Kombëtar, nuk mund të konsiderohet njësoj si godinat e tjera apo monumentet që janë në mbrojtje. Ai shtoi se në territorin aktual të Teatrit do ndërtohet vetëm teatër, ndërsa në pjesën tjetër që eshtë në pronësi të privatit mund të bëhet çdo gjë.
“Nga 2013 e këtej ka më shumë kompani që kanë fituar më shumë tendera në shtet apo leje ndërtimi dhe nuk ka logjikë të flasim për oligarkë. Sot të pasurit paguajnë më shumë taksa.”
