Ministri i Financave Petrit Malaj e konsideron buxhetin e vitit 2026 si një ndër draftet më të mira, pasi çdo sektor që ka ndikim në jetën ekonomike të vendit ka rritje fondesh. Gjatë një interviste për emisionin “E –ZONE” në Vizon Plus, Malaj tha se buxheti mbështetet në 4 shtylla kryesore.
“Janë shtylla të cilat mbështeten në mirëqenien sociale të qytetarëve, në qëndrueshmërinë ekonomike, në konsolidimin fiskal si dhe në funksion të procesit të integrimit në Bashkimit Europian. Projektbuxheti i viti që vjen është një ndër më të mirët, pasi teksa planifikojmë të rrisim nivelin e shpenzimeve, këto fonde shtesë nuk vijnë nga rritja e taksave, as nga rritja e borxhit. Paratë vijnë nga miradministrimi fiskal. Të gjithë zërat, pa përjashtim, të buxhetit të vitit të ardhshëm janë me rritje”, tha Malaj.
Por projektligji më i rëndësishëm parashikon që të ketë rritje pagash dhe pensionesh në vitin e ardhshëm. Ndërsa politika e bonuseve për pensionistët po mbaron.
“Vitin që vjen do të indeksojmë pagat në masën 2.5%, por paralelisht për disa kategori do të kemi dhe rritje pagash. Ndërsa 2026 shënon nisjen e reformës në skemën e pensioneve. Reforma parashikon rritje vit pas viti deri në 2028”, tha ai.
Ministri i Financave ka edhe një përgjigje për akuzat e opozitës lidhur me projektin e shumë debatuar, atë të paqes fiskale.
“Paqja fiskale nuk është amnisti, ne nuk ofrojë siguri juridike për ata që janë në hetim apo ata me vendim gjykate. Në frymën e transparencës këtë nismë e kemi konsultuar edhe me FMN dhe BE. Kemi marrë për bazë praktikën italiane të paqes fiskale, pra një praktikë europiane”, shtoi Malaj.
Intervistën e plotë të ministrit të Financave Petrit Malaj, dhënë për gazetaren Rajmonda Lajthia, mund ta ndiqni sonte në mbrëmje në emisionin “E-ZONE”./vizionplus.tv
