Përpara balotazhit të kësaj të diele, presidenti Emmanuel Macron dhe rivalja e ekstremit të djathtë Marine Lë Pen u përballën në një debat të ashpër televiziv. Dy kandidatët u përplasën veçanërisht mbi marrëdhëniet me Rusinë dhe mbulesën islame.
Macron përmendi një hua që partia e Lë Pen kishte marrë nga një bankë çeko-ruse përpara fushatës së saj zgjedhore të vitit 2017.
“Ju jeni të varur nga qeveria ruse dhe jeni të varur nga presidenti Putin. Kur flisni me Rusinë, po flisni me bankierin tuaj.”
Lë Pen u përgjigj se ajo ishte një grua absolutisht e lirë, duke argumentuar se partia e saj kishte marrë vetëm atë kredi, pasi nuk mund të gjente financim në Francë ku bankat refuzuan t’i jepnin hua.
Le Pen gjithashtu konfirmoi se do ti përmbahej politikës së saj kontroverse të ndalimit të mbajtjes së mbulesës islame në publik.
“Besoj vërtet se mbulesa islame është një uniformë e imponuar nga islamistët dhe vajzat e reja që e veshin, pjesa më e madhe e tyre janë të detyruara. Nëse nuk do ta bënin kërcënohen nga sulmet, dhuna dhe izolimi. Prandaj ne duhet ti lirojmë ato gra, një situatë e tillë nuk mund të tolerohet në vendin tonë.”
Sa i takon raporteve me bllokun evropian, Emmanuel Macron i vlerësoi zgjedhjet si një referendum pro ose kundër BE-së.
Ndërsa Le Pen këmbënguli se ajo dëshironte të qëndronte në Bashkimin Evropian, por të reformonte unionin në një aleancë kombesh.
Macron mbetet favorit për të fituar balotazhin e 24 prillit ndërsa sondazhet flasin për një avantazh prej mbi 10 përqind, gjë që do ta bënte atë presidentin e parë francez që fiton një mandat të dytë që nga Zhak Shirak në vitin 2002.
