Franca dhe Britania e Madhe do të mbështesin Ukrainën për aq kohë sa është e nevojshme “për të penguar luftën e agresionit të Rusisë”, kanë thënë presidenti francez Emmanuel Macron dhe kryeministri britanik Keir Starmer, raporton BBC.
Kryeministri britanik zhvilloi një takim me Presidentin francez gjatë të cilit, ndër të tjera folën për pushtimin e Rusisë dhe ndalimin e migracionit të paligjshëm në Kanal.
Në një deklaratë nga Pallati Elysee u bë e ditur se të dy udhëheqësit kishin riafirmuar angazhimin e tyre për të “mbështetur Ukrainën në mënyrë të palëkundur”.
Takimi i tyre vjen pas pikëpyetjeve që janë ngritur në lidhje me mbështetjen e presidentit të zgjedhur të SHBA-së, Donald Trump për Ukrainën, pasi ai tha se mund t’i jepte fund luftës “brenda një dite”.
Një deklaratë e mëtejshme nga Downing Street tha se dyshja diskutuan se si ta vendosnin Ukrainën në “pozitën më të fortë të mundshme teksa po shkojmë drejt dimirit”.
Nuk kishte detaje nëse të dy udhëheqësit do të mbështesnin lejimin e Ukrainës për të përdorur raketa me rreze të gjatë “Storm Shadow” thellë në territorin rus./vizionplus.tv
