Presidenti francez Emmanuel Macron dhe kancelari gjerman Friedrich Merz i kanë bërë thirrje Iranit të ulë tensionet dhe të rikthehet në tryezën e bisedimeve me Shtetet e Bashkuara.
Në një deklaratë të përbashkët, të publikuar pas mbledhjes së Këshillit të Mbrojtjes dhe Sigurisë të Francës dhe Gjermanisë, dy liderët i kërkuan Teheranit të shmangë çdo përshkallëzim të mëtejshëm ushtarak.
“Ne i bëjmë thirrje Iranit të përmbahet nga çdo veprim ushtarak ose veprim tjetër që mund të vërë në rrezik negociatat”, thuhet në deklaratën e përbashkët.
Macron dhe Merz theksuan gjithashtu nevojën për rihapjen sa më shpejt të Ngushticës së Hormuzit, një prej rrugëve detare më të rëndësishme në botë për transportin e naftës dhe gazit natyror të lëngshëm.
Sipas tyre, rikthimi i lundrimit të lirë në këtë zonë është thelbësor për stabilitetin e tregjeve ndërkombëtare të energjisë dhe për shmangien e një përshkallëzimi të mëtejshëm të krizës në Lindjen e Mesme.
