Pamja e shtratit të lumit Mat në Bashkinë e Klosit është vërtetë alarmante teksa të dy anët e tij janë të “pushtuara” nga mbeturina plastike. Një pjesë e madhe e këtyre mbeturinave qëndrojnë në bimësinë përgjatë shtratit të lumit Mat që nga viti 2016 kur shirat e mëdha shtuan ndjeshëm prurjet e lumit, të cilat morën me vete edhe mbeturinat që nga burimi i këtij lumi.
Ndonëse kanë kaluar afro 4 vite, asnjë nismë nuk u mor për pastrimin e shtratit të lumit nga këta mbetje që qëndrojnë të varura në bimësi si një dekor i dorës së njeriut.
Specialistët e mjedisit thonë se pasojat e kësaj ndotjeje janë tepër të mëdha, qoftë në gjallesat ujore të cilat jetojnë në lumin Mat e liqenin e Ulzës, por edhe në ekosistem. Prania e mbeturinave nga më të ndryshmet, duke nisur nga plastika e deri tek leckat, japin impaktin e tyre nëgativ në natyrën që përshkojnë.
Në vitin 2014, ish Ministri i Mjedisit Lefter Koka urdhëroi kryetarët e Bashkive për të pastruar mjedisin e Njësive që drejtonin, në të kundërt ata do të gjobiteshin. Por edhe kjo nismë nuk funksionoi pasi pushteti lokal ishte i pafuqishëm përballë ndotjes së madhe të mjedisit të tij. Ministria e Mjedisit 6 vite më parë dha vetëm urdhër, duke mos marrë parasysh koston e madhe që i duhej pushtetit vendor në këtë drejtim. Aktualisht Bashkia Klos mbulon vetëm 30% të territorit të saj me shërbimin e grumbullimit dhe tërheqjes së mbeturinave, që konsiston vetëm në zonat me rrugë të asfaltuara.
