Profesor, akademik Anastas Angjeli është i mendimit se lufta në Iran është një sinjal i një prag krizë të re globale.
Por efektet negative të këtij konflikti do të varen nga kohëzgjatja e sulmeve. Sipas tij lufta ka nisur, por askush nuk e di se kur do të mbyllet.
Në një javë konflikt efekti i parë është pasiguria energjetike.
“Ngushtica e Hormuzit nuk është thjesht një korridor ujorë që kalojnë disa anije. Ai është një autostradë energjetike ku kalon gati 25 % e naftës dhe gazit të lëngshëm. Bllokimi i kësaj rruge dhe i anijeve me naftë ka sjellë menjëherë rritje të çmimit të naftës, rritje të primit të sigurimeve, rritje të kostove të transportit dhe ulje të përpunimit të mallrave. Kjo pasiguri energjetike, që është dhe tregu më sensibël shoqërohet me pasiguri ekonomike. Pasiguria është dhe elementi më i rëndësishëm që shoqërohet me rritje të çmimeve”, tha Angjeli në emisionin E-ZONE në Vizion Plus.
Por si mund të preket ekonomia shqiptare nga tensionet dhe lufta në Lindjen e Mesme. Katër janë mënyrat se si lufta mund të mbërrijë tek ne.
“Që në javën e parë kanë nisur të ndihen efektet. U rrit çmimi i naftës, produkti bazë për ekonominë. Paralelisht rreziku potencial është një rritje e importuar e inflacionit. Nëse do të kemi rritje të çmimeve të energjisë në tregjet ndërkombëtare, kjo mund të krijojë presion mbi buxhetin, pasi Shqipëria del në tregjet ndërkombëtare për të blerë energji. Pasuria që krijon lufta mund të shoqërohet me një ngadalësim të investimeve të huaja dhe paralelisht mund të presim një ngadalësim të tregut turistik”, tha Angjeli.
Gjithsesi të gjithë këto skenar janë teorik. Ato mund të materializohen vetëm nëse konflikti zgjatet pa një afat të përcaktuar. Ajo që mund të themi në këtë javë të parë është shtrenjtimi i çmimit të naftës, si efekti i parë dhe i menjëhershëm.
/vizionplus.tv
