Eksperti i sigurisë Dritan Goxhaj, i ftuar në emisionin Quo Vadis të moderatores Pranvera Borakaj në Vizion Plus, ka theksuar se Shqipëria është shumë larg asaj që po ndodh në Iran.
Sipas tij, iranianët e strehuar në Manzë nuk kanë asnjë rëndësi në Iran. Ai tha se MEK nuk pati asnjë protestues në terren gjatë protestave në janar.
Pjesë nga biseda:
Borakaj: Kur mbaron lufta?
Goxhaj: Nuk mbaron me fuqinë ushtarake, ka të bëjë me presionin ekonomik. Donald Trump këtë vit ka zgjedhjet. Ai bën vetëm llogari. Sot 3 në 4 amerikanë janë kundër luftës. Të jemi të bindur që Trump do të gjejë një rrugëdalje, sepse përndryshe humbet zgjedhjet në nëntor. Edhe nesër mund ta ndalë luftën, thotë: ‘e vramë Ajatollahun’. Irani nuk është organizatë terroriste, është një shtet 2500-vjeçar. Kufijtë e Iranit nuk kanë për të ndryshuar as sot.
Kurdët janë gabimi më i madh. Kur ti fut të jashtëm, opozita e brendshme bashkohet dhe këtu merr fund. Unë mendoj se me kurdët nuk është bërë. Ka pasur një operacion mbrëmë në brendësi të Iranit dhe për këtë është krijuar ideja se po hyjnë kurdët në veri. Ata kanë grupe të armatosura në Iran, por janë të vogla.
Sa i përket çështjes së iranianëve që janë te ne, ndryshojnë nga ata në Francë. Këta te ne kanë statusin humanitar, ndërsa ata atje janë me status emigranti politik. Ata atje bëjnë politikë, jo këtu. Pra kjo zonja, në vend që ta shpallte atje deklaratën, e bëri në Durrës. Herën e fundit që MEK ishte faktor në Iran ishte në vitin 2007. Edhe në janar të këtij viti MEK nuk kishte njerëz në terren. Pra ne nuk rrezikohemi nga ajo punë fare.
