Luan Rama ka reaguar pas komentit të kryeministrit Edi Rama mbi listat e kandidatëve të PD dhe LSI-së.
Përmes një postimi në “Facebook”, nënkryetari i LSI-së shprehet se Rama është bërë një llapëtyrë e marrëzisë. Ai shtoi se të rinjtë që përfaqësojnë LSI-në në listat e kandidatëve për deputetë në zgjedhjet parlamentare do ta shpëtojnë Shqipërinë nga Rama.
“LLAPËTYRA E MARRËZISË. E bëri sot dhe ka për ta bërë sërish edhe nesër. Edhe pasnesër. Edhe në çdo ditë deri me 25 prill. Sepse kryetari i rilindjes nuk di të bëjë tjetër gjë, përveçse të llapërojë llapëtyrën e vet të marrëzisë, për të na thënë të gjithëve se çfarë llapëtari është. Mos u merrni me të. Lëreni të llapërojë. Eshtë në habitatin e vet. Djemtë dhe vajzat e mrekullueshëm që përfaqësojnë Lëvizjen Socialiste për Integrim në listat e kandidatëve për deputetë në zgjedhjet e 25 prillit, kanë një mision për të përmbushur; të shpëtojnë Shqipërinë nga llapëtyra e marrëzisë.”
Për Partinë Demokratike, Rama u shpreh se lista e PD ishte zhgënjyese, ndërsa e quajti afirmim të fosilizimit. Nga ana tjetër, per listën e LSI tha se është katandisur si mos më keq.
