Kreshnik Spahiu vlerëson që emrat e socialistëve që kandidojnë për gjashtë bashkitë e vendit janë vendosur qëllimisht nga kryeministri Edi Rama. Sipas tij, kreu i qeverisë në këto zgjedhje “luajti me stolin e rezervave”.
“Edi Rama dhe socialistët kanë luajtur me stolin e rezervave. Mendoj që qëllimisht socialistët nuk kanë vendosur kandidatura të forta, kandidaturat e vendosuar janë anonimë, nuk janë personalitete, figura me background politikë, kjo është e qëllimshme. Nuk mund të paragjykoj arsyen pse Rama ka vendosur ekip rezervë. Një nga arsyet është që më mirë të vendosim disa gra anonime që nuk kanë precedentë penalë, një tjetër është që t’i hapë krahun opozitës për të marrë një bashki.”
Ai kritikoi ashpër edhe opozitën.
“Është bërë batardia në këtë vend, sepse nuk kemi opozitë. Me këtë opozitë të dobët, edhe në zgjedhjet e 2023 përsëri do të fitojë PS, edhe në 2025 do të fitojë PS, do të hyjmë në një ngërç të jashtëzakonshëm, do të kemi një zgjatje të pushtetit të Ramës”, u shpreh Spahiu për “Vizion Plus”.
