Sekretari i Përgjithshëm i LSI, Endrit Braimllari deklaroi se mbyllja e hetimeve për Unazën e Re, është vepër e qeverisë Rama.
Ai shtoi se nuk është aspak normale që për një skandal kaq të madh me 40 milion euro dëm të kalojë për gjykim vetëm një recepsionist.
Braimllari shtoi se qytetarët prisnin që përpara drejtësisë të shkonin përfaqësuesit shtetërorë për një skandal të këtyre përmasave.
Sekretari i Përgjithshëm i LSI tha se SHBA po dhunon qytetarët e ndershëm dhe mbron të korruptuarit dhe kriminelët.
Të gjithë shqiptarët për më shumë se një vit, kanë qenë dëshmitar të ngjarjes më të madhe korruptive të ndodhur në kurriz të qytetarëve të ndershëm dhe të pafajshëm të Unazës së Re. Edi Rama për më shumë se një vit i dhunoi, i arrestoi, hodhi gaz lotsjellës kundër fëmijëve 5 vjeçarë, të moshuarve dhe përdori çdo mekanizëm shtetëror në funksion të interesit të tij personal. Për më shumë se një vit, kjo çështje ka qenë nën hetim nga prokuroria. Qytetarët prisnin të shkonin përpara drejtësisë përfaqësuesit shtetërorë të cilët implementuan një projekt me dokumente të falsifikuara ku kërkonin të gllabëronin 40 milionë euro. Prokuroria vendosi të çojë për gjykim me një akuzë qeshkarake vetëm një recepsionist.
Zyrtari i LSI kërkoi që skandali i tenderit 40 milion euro në Unazën e Re, të jetë subjekt hetimi nga SPAK, me qëllim që Rama, Gjiknuri etj të hetohen për këtë cështje.
Kjo çështje duhet të ishte subjekti i parë i hetimit nga SPAK, me qëllim që jo vetëm të krijohej besimi te qytetarët por të shkonin përpara drejtësisë zyrtarët e korruptuar. Edi Rama, Damian Gjiknuri, Afrim Qendro dhe të gjithë të tjerët të përfshirë në këtë aferë. Është e qartë që ‘Ramaforma’, burgos qytetarët e thjeshtë, të pafajshëm, të ndershëm dhe mbron të korruptuarit, kriminelët me urdhër qeveritar. Prokuroria duhet të kishte marrë nën hetim Edi Ramën, Damian Gjiknurin, Afrim Qendron dhe të gjithë zyrtarët e tjerë të lartë të përfshirë në këtë aferë korruptive.
