Ministri i Brendshëm, Sandër Lleshaj këtë të mërkurë ka qenë në Krujë, ku ka theksuar se kultivimi i kanabisit tashmë është një çështje e mbyllur përfundimisht.
Në këtë vizitë në Krujë, ai është takuar me përfaqësues të pushtetit vendor, drejtues të strukturave të Policisë, autoritete të mjedisit dhe Inspektorate të tjera në Qark, Lleshaj paralajmëroi të gjithë autoritetet lokale të kenë angazhim të plotë në përputhje me detyrat që përcaktohen nga Plani Kombëtar Antikanabis.
“Shqipëria është e angazhuar botërisht, që të dalë nga harta e kanabisit. E kemi arritur, por duhet të jemi të qëndrueshëm që kjo punë të vijojë. Plani Kombëtar Kundër Kanabisit parashikon detyra të qarta për të gjithë institucionet. Institucioni i fundit të cilit i drejtohet Plani, është Policia. Policia ka për të bërë vetëm një pjesë të punës, pjesën e ligj zbatimit. Ndërkohë që pjesën tjetër, kontrollin e territorit duhet ta bëjnë institucionet e tjera, sensibilizimin e qytetarëve duhet ta bëjnë institucionet e tjera. Do të kërkoja shumë prej të gjithë administratorëve lokalë, nga bashkia, nga njësitë administrative, nga kryepleqtë që të kuptojnë mirë këtë thirrje”.
Gjithashtu ministri k apeluar edhe ndaj aksioneve të fundit të Task Forcës ndërministrore, ku u bllokuan 12 gurore për ndalimin përfundimtar të shkatërrimit të mjedisit.
“Është zhvilluar një industri e guroreve, e zhavorrit, e inerteve e të tjera me radhë dhe pasojat e kësaj ju i shihni vetë. Ajo që është bërë është vështirë të zhbëhet më. Por kjo punë duhet të stopohet, të ndalohet njëherë e përgjithmonë. Dhe pastaj, të gjitha institucionet përkatëse, qofshin ato lokale, qofshin këto qendrore, duhet të marrin masa për rikuperimin e gjendjes, aq sa mund të rikuperohet”.
