Presidenca reagon pas sulmeve që erdhën me kthimin në kuvend nga presidenti të ligjit për Teatrin Kombëtar. Kreu i shtetit Meta refuzoi hyrjen në fuqi të ligjit që i hap rrugë Teatrit, duke ia rikthyer edhe njëherë Parlamentit për rishqyrtim.
Në argumentet e tij ligjore, Presidenti ka listuar 8 shkelje ligjore, për të cilat në kushte normale ka theksuar se do të kërkonte që të shprehej Gjykata Kushtetuese.
Ndërkohë në reagimin e zëdhënësit të Presidentit të Republikës, Tedi Blushi sqaohen të gjitha arsyet e kthimit të ligjit në Kuvend, dhe ju është përgjigjur të gjithë kritikëve përpërfshi këtu kryetarin e bashkisë së Tiranës Erion Veliaj.
“Presidenti i Republikës, duke ndjekur reagimet politike pas publikimit të dekretit për kthimin për rishqyrtim në Kuvend të ligjit nr. 37/2018 “Për përcaktimin e procedurës së veçantë për negocimin dhe lidhjen e kontratës me objekt: Projektimi dhe realizimi i projektit urban dhe godinës së re të Teatrit Kombëtar”, shpreh keqardhjen për reagimet sipërfaqësore, emocionale e të pathelluara.
Presidenti i Republikës i fton të gjithë të shqetësuarit për ndërtimin e një teatri të ri të kenë durim e të lexojnë me objektivitet dekretin, të gjithë arsyetimin, argumentet dhe konstatimet ligjore të cilat bazohen vetëm në Kushtetutën e Shqipërisë, konventat e marrëveshjet ndërkombëtare ku vendi ynë është palë, detyrimet që lindin prej tyre dhe legjislacionin tonë në fuqi.
Dekreti i Presidentit të Republikës i mbështet argumentet vetëm mbi dokumentacionin zyrtar bashkëshoqërues të ardhur nga Kuvendi i Shqipërisë.
Presidenti i Republikës është i bindur se, nëse të gjithë do të udhëhiqen vetëm nga interesi kombëtar dhe publik, jo vetëm garantohet ruajtja e kompleksit teatror e restaurimi i tij si pjesë e trashëgimisë kombëtare, por edhe garantohet ndërtim i teatrit të ri në mënyrën më transparente e më të përgjegjshme, duke respektuar plotësisht legjislacionin aktual si dhe duke shmangur çdo konflikt artificial.
Me këtë rast Presidenti i Republikës fton të gjithë të interesuarit për zgjidhje të lexojnë me vëmendje në faqen zyrtare të Institucionit të Presidentit të Republikës:http://president.al/njoftim-per-media/ dekretin, arsyet e kthimi për rishqyrtim në Kuvend të këtij ligji. “
