Kryeministri Edi Rama deklaroi këtë të hënë se kancelarja gjermane, Angela Merkel e mbështet ligjin “Anti-KÇK”. Me anë të një video-mesazhi në “Facebook”, Rama bëri me dije se ky lig shumë shpejt do të hyjë në fuqi.
“Ajo u shpreh shumë pozitivisht për ligjin special kundër krimit të organizuar dhe amendamentet speciale anti KCK që do të hyjnë në fuqi ditët e ardhshme pas konsultimeve përfundimtare me ekspertët ndërkombëtarë.”
Kreu i qeverisë zbuloi se gjatë takimit me Merkel, ka marrë mbështetjen e Gjermanisë për të ndihmuar me rindërtimin edhe pas Konferencës së Donatorëve.
“Takimi ishte shumë domethënës. E para sepse me rindërtimin kancelarja u shpreh se Gjermania do të marrë përsipër pjesën që i takon qoftë për konferencën e donatorëve apo më tutje, pasi e dinë se konferenca do të ndihmojë, por nuk do të përmbushë të tërë nevojën, pasi kjo nuk është as objektivisht e mundur. U shpreh pozitive për idetë dhe na dha sugjerime të dobishme duka na ofruar ndihmë teknike për strukturimin.”
Më tutje, Edi Rama foli edhe një herë për procesin e integrimit, ku shtoi se hapja e negociatave në mars nuk është e pamundur.
Gjatë konferencës së përbashkët që pati me Merkel pas takimit në Berlin, Rama shprehu mirënjohjen për ndihmën e dhënë nga Gjermania për rindërtimin pas tërmetit.