Nga 1 shkurti nis tarifimi i çmimit të ri të energjisë elektrike, 8.5 lekë apo 10.2 lekë me tvsh, për një konsum deri në 700 kw/h në muaj.Mbi këtë konsum çmimi mbetet i pandryshuar 11.4 lekë me tvsh.
Drejtuesit e OSHEE sqarojnë se fatura do të ketë një çmim, ndaj ky vendim nuk do të thotë rikthim i fashave. Por, sfida më e madhe e këtij vendimi është leximi i matësve brenda muajit.
“Unë kam urdhëruar qëçdo lexues ka përgjegjësinë që matësi të lexohet brenda muajit. Kemi bërë dhe një ndarje pune dhe kemi evidentuar numrin e abonentëve që janë nëkufijtë e 600-700 kw/h në muaj që janë rreth 130 mijë. Do të kemi një monitorim të tyre me qëllim që të shmangim abuzimet me faturimin e konsumit”, sqaroi Karakaçi gjatë intervistës në“E-ZONE”.
Por, për të shmangur çdo paqartësi apo abuzim, kompania pritet të hapë në ditët në vazhdim thirrjen për lexues shtesë.
“Ne kemi të gjitha mundësitë që edhe sot të bëjmë të pamundurën që të lexojmë matësit në kohë, por ne do të hapim një thirrje bashkë me ministrinë për të rekrutuar punonjës shtesë. Konkretisht kemi nevojë për lexues. Në këtë fazë nevojat tona janë për 100 lexues plus,çka do na jepnin ne sigurinë e shmangies së gabimeve. Për aq kohë sa leximi i matësit është manual rreziku i gabimeve mbetet prezent”, tha Karakaçi.
Nga të dhënat tona përfitues të uljes së çmimit të energjisë janë 90% e abonentëve familjarë. Ky çmim synon që të nxisë konsumatorët të kursejnë energjinë elektrike. /vizionplus.tv
