Kryeministri Edi Rama ka konfirmuar refuzimin që i ka bërë Dritan Leli ftesës për të kandiduar në zgjedhjet parlamentare.
Gjatë prezantimit të objektivave, kreu i qeverisë tha se i propozoi që të bëhej pjesë e skuadrës së 25 prillit, por ka qenë Leli ai që nuk e ka pranuar.
Pavarësisht zgjedhjes së kryebashkiakut të Vlorës, Rama theksoi se PS do të realizojë objektivin maksimal që është arritja e 88 mandateve.
“Në formimin e një skuadre ka dinamika të brendshme. Këtu nuk ka rëndësi fare se çfarë ka menduar njëri apo tjetri. Është e vërtetë që unë i kam propozuar që ai të bëhet pjesë e skuadrës, nuk e ka parë të arsyeshme, është zgjedhja e tij. Me të, pa të skuadra jonë në Vlorë do realizojë objektivin bazë dhe do shkojë shumë afër objektivit maksimal që është plotësisht i mundur sipas meje, s’ka asnjë problem”, nënvizoi Edi Rama.
