Qeveria miratoi pak ditë më parë legalizimin e kanabisit për arsye mjekësore, ndërsa është parashikuar që në total do të jenë 200 ha tokë në rang kombëtar, që mund të kultivohet me bimë narkotike.
Por për ekspertin e ekonomisë Mateo Spaho, drafti i qeverisë nuk është i keq, por sipas tij duhet më shumë konsultime dhe studime për draft-ligjin.
Ai tha në një intervistë për Vizion Plus se drafti i miratuar nga qeveria është përafruar me atë të Maqedonisë së Veriut, për të cilën tha se ndërmarrjet nuk kanë dalë me fitime të larta.
“Në parim nuk mund të them që jam kundër por duhet parë jo vetëm draft ligji por edhe zbatueshmëria e tij. Drafti nuk është i keq, por duhet të themi që bashkë me draft ligjet kemi edhe rezultatet e praktikave ndërkombëtare. Ai më i afërt është ai i Maqedonisë së Veriut, që prej vitesh kultivohet kanabisi për arsye mjekësore. Ndërmarjet që janë marrë me këtë nuk kanë dalë me fitime të lartë dhe cilësia e bimës ka qenë e vështirë për tu verifikuar”, tha Spaho.
Por a do të ketë Shqipëria rritje të ardhurash nga legalizimi i kanabisit?
“Në fakt nëse do zbatohej ligji, edhe Shqipëria nuk do kishte të ardhura të larta. Ka disa problematika të tjera. Kush na siguron ne që kanabisi që do mbillet përtej kësaj hapësire do përdoret për mjekësi, ose prodhimi i atij kanabis që prodhohet brenda 200 ha do përdoret për mjekësi.
Problemi është që ca vende të tjera kanë edeh sisteme policore që funksionojnë dhe shkelja e ligjit është në raste të vogla. Paligjshmëria në disa raste është kthyer në sistem në vendin tonë. Është vështirë të japim një mendim pozitiv.
Na duhet një relacion se sa taksa do nxjerrë shteti nga këto biznese, sa do jetë numri i të punësuarve dhe rreziqet që mund të ndodhin. Që të kalojë një ligj i tillë duhet të bëhet një diskutim serioz me ekspertët e fushës. Ky diskutim nuk është bërë”, tha Spaho.
Eksperti i ekonomisë, është i mendimit që qeveria nuk ka bërë analizat dhe konsultimet e duhura para se draft-ligji të miratohej.
“Edhe lojrat e fatit që qeveria vendosi ti hiqte i hoqi për çështje pariomore, edhe pse sillnin të ardhura.
Për sa i përket konsultimin me organizatat jofitimprurëse, nuk më kujtohet se kush do ishin përfitimet konkrete me shifra, sa para do merrte shteti, pasojat tek punësimi, a do krijohej një kompani përpunuese, sa do ishin eksporett, cilat do ishin efektet kolaterale etj. Nëse ne nuk i kemi këto shifra nuk kemi bërë një konsultim dhe analizë reale”, tha Spaho.
Nisma për legalizimin e kanabisit për qëllime mjekësore është kundërshtuar nga Bashkimi Europian, së bashku edhe më amnistinë si dhe me nismën e pasaportave të arta. Janë nisma që kanë përfshirë në debat ekspertë lidhur me përfitimet apo dëmet që mund të jetë ekonomia.
