LDK mori një vendim ndëshkues ndaj Vjosa Osmanit. Këshilli i Përgjithshëm i partisë vendosi të shkarkojë nga çdo pozicion që ajo mbante. Vendimi erdhi pasi Vjosa Osmani refuzoi të votonte qeverinë e re të Kosovës me kryeministër Avdullah Hotin.
Mustafa propozoi që Vjosa Osmani pasi ka shkelur statutin e partisë të shkarkohet si nënkryetare partie dhe nga anëtare e Kryesisë, ndërkohë në pozicionin e parë të zëvendësohet nga kryeministri Avdullah Hoti. Vjosa Osmani reagoi në “Facebook” për këtë vendim.
“Po përjashtohem e diferencohem sepse: Thashë kurrë me të korruptuarit, dhe ashtu mbeti; Thashë do t’i sjellim Kosovës ndryshimin e jo mendësinë e vjetër në pushtet, dhe ashtu mbeti; Thashë se nuk do ta përkrahë asnjë tregtar të kufijve e të sovranitetit, dhe ashtu mbeti. Thashë për Kosovën do të kërkojmë barazi nëpërmjet reciprocitetit, dhe ashtu mbeti; Thashë se askujt nuk do t’i punojmë pas shpine, dhe ashtu mbeti; Pra, u diferencova e shkarkova sepse e mbajta fjalen. U diferencova edhe për shkak se jam grua, sepse asnjë nënkryetar burrë në të kaluarën, edhe kur kanë kundershtuar e vepruar kundër vendimeve të partisë, nuk janë përjashtuar.”
Ajo paralajmëroi ata që votuan për shkarkimin e saj se shumë shpejt do të përballen në zgjedhje për të parë se kush gëzon pëlqimin e qytetarëve. Vjosa Osmani tha se vetëm populli mund ta rrëzojë atë.
