La pa fjalë jurinë me zërin e tij, Klejvi Kapeta tregon “kurthin” që i ngriti motrës pas performancës në “Albania’s Got Talent”

Talente në shumë fusha të artit “pushtuan” skenën e “Albania’s Got Talent” që prej të hënës së 11 nëntorit, ku spektakli i preferuar dhe i munguar i shqiptarëve hapi siparin në Vizion Plus.

Nuk kishte si të mos rrëmbente vëmendjen shkodrani 15 vjeçar që drithëroi publikun dhe jurinë me zërin e tij. Klejvi Kapeta më këngën “Mon amour” arriti të merrte 4 “PO” nga juria, por jo vetëm kaq.

Mes komenteve pozitive, Ledina Çelo, anëtarja e jurisë e cilësoi 15-vjeçarin si pretendent për të fituar “Albania’s Got Talent”.

I ftuar në “Vizion i Pasdites”, konkurenti Klejvi Kapeta rrëfeu emocionet pas performancës shumë të pëlqyer në spektakël. 15-vjeçari shprehet se i kishte vendosur një kusht vetes që të merrte 4 “PO” nga juria dhe ja doli më së miri.

“Ishte diçka e re për mua. Diçka që nuk e kisha provuar një skenë e re, dhe nuk e dija si do e priste juria. Fatmirësisht juria e pëlqeu shumë dhe publiku u ngrit në këmbë. Unë i kisha vendosur një kusht vetes që do merrja 4 “PO”. Kur i pashë në audicione anëtarët e jurisë isha pak në merak se si do më prisnin. Kur po shkoja tek mikrofoni, sa u ngjita në skenë isha shumë i emocionuar. Kisha qejf që të sfidoja veten me atë këngë. Ishte një kohë as e gjatë, por as e shkurtër që unë punova për këngën, por me punë e sakrificë arrihet çdo gjë“, tha Klejvi Kapeta.

Gjithshtu Klejvi Kapeta tregoi se mbështetësja e tij më e madhe është motra që jeton në Amerikë për studime. Ai rrëfeu dhe “kurthin” që i punoi pas performancës.

“Motra që jeton në Amerikë është mbështetësja ime më e madhe. E mora në telefon sapo dola nga performanca dhe bëra si i mërzitur. I thashë që nuk u prita mirë, por pastaj ja tregova që mora katër “PO”. Ajo më uroi, por më dha edhe disa kritika”, tha ai.