Ahmet Xhafo është kryetari i ri i Kuvendit të Vatrës. Në mbledhjen e zhvilluar para pak ditësh, Ahmet Xhafo u votua unanimisht nga delegatët e zgjedhur. Ai është nga Çamëria dhe i ka shërbyer Vatrës për më shumë se pesë dekada.
Babai i tij, Taip Xhafo, rrjedh nga një familje pashallarësh, dhe merrej me tregëti. Xhaxhai i tij, Kasimi kishte emigruar në SHBA para Luftës së Dytë Botërore. Në dhjetor të vitit 1960, Ahmet Xhafo emigroi në Hartford, Connecticut, ku u bashkua me xhaxhanë e tij.
Gjatë mbledhjes së Kuvendit, ku ishin të ftuar nga Shqipëria, Kanaddaja, klerikë dhe shoqata shqiptare në SHBA, u përcaktua një platformë e re për të ardhmen e Vatrës.
Kuvendi i Vatrës do të mbështesë popullin shqiptar për bashkim kombëtar e prosperitet ekonomik, do të rrisë ndërgjegjësimin për krimet e regjimit komunist, do të forcohen dhe promovohen marrëdhëniet SHBA-Shqipëri/Kosovë, do të vazhdojnë të jepen bursa nga Vatra për studentët shqiptaro-amerikanë që janë në nevojë dhe ndihma për familjet shqiptare të zhvendosura nga katastrofa natyrore.
Aktivisti shqiptar në SHBA, Elton Mara premtoi se fryma e bashkëpunimit në Vatër do të vazhdojë njësoj, edhe pas ndryshimeve në Kuvend.
“Vatra u godit rëndë në Qershor 2017 dhe u përça ne 11 Dhjetor 2019, kur kryesia e paligjshme mori vendimin për mbajtjen e Kuvendit në 19 Janar 2020. Ne si Komision gjithmonë kemi qenë të hapur dhe transparent për bashkëpunim, por kur nuk ka vullnet për bisedime dhe ulje në tavolinë për të gjetur një gjuhë të perbashket, atëherë fatet e kësaj organizate që po lëngon nuk mund të lihen në duart e atyre që kërkojnë përfitime personale apo kredo politike.”
Kryesisë së vjetër, që Komisionin Vatra të 5 Tetorit e quan antikushtetues, Mara ju përgjigj duke e akuzuar ata shkatërruan Kanunoren e Vatrës për dy vjet më radhë.
