Gazetarja Eksiola Shehu tha se 19 tetori është afati i fundit kur partitë duhet të dorëzojnë emrat me kandidatët për bashkitë ku do të mbahen zgjedhjet e parakohshme.
E ftuar në studion e Quo Vadis në Vizion Plus me moderatoren Pranvera Borakaj, Shehu nënvizoi se në 4 bashkitë, Berat, Mat, Tepelenë dhe Cërrik socialistët do të shkojnë me figura lokale, teksa shtoi se për bashkinë e Vlorës, duke qenë se Rama ka pasur pakënaqësi, mund të shkojë me një kandidat që s’është banues në Vlorë.
Eksiola Shehu u shpreh se të 6 bashkitë janë fituar nga PS në 2023, dhe duke qenë se janë zgjedhje të parakohshme, socialistët shkojnë të sigurt më 9 nëntor.
Pjesë nga biseda:
Borakaj: Kur do i ketë gati emrat PS për 5 bashkitë e tjera?
Shehu: Tirana e ka gati kandidaten. Bashkitë e tjera kanë një peshë më të ulët elektorale, me përjashtim të Vlorës. Socialistët do të shkojnë me figura lokale. Ndërsa në Vlorë, duke qenë se është pikë e dobët e Ramës, mund të jetë edhe një emër që nuk vjen nga Vlora. Kjo mbetet për t’u parë. Duke parë edhe kritikat dhe pakënaqësitë që ka pasur z. Rama për Vlorën. Rama nuk është ndarë mirë me kryetarët e bashkisë së Vlorës, veç Dredhës që bëri vetë një hap pas.
Borkaj: Edhe kjo kishte pikëpyetje nëse iku vetë apo e larguan.
Shehu: Po, se ishte një natë para asamblesë. Dhe gjithkush e lidhi edhe me dhënien e një posti në ministri.
Borkaj: Shkojnë të sigurt socialistët?
Shehu: Të 6 bashkitë janë fituar nga socialistët në 2023 dhe duke marrë parasysh që janë zgjedhjet e parakohshme, është më lehtë që një parti në pushtet të triumfojë.
Borkaj: Është ekskluzivitet i Ramës emri apo ka konsultim?
Shehu: Ka konsultime me drejtuesit politikë, ku pritet të jetë mbledhja e kryesisë javën e ardhshme. 19 tetori është afati i fundit për të depozituar emrat.
/vizionplus.tv
