Mullah Hasan Akhundi, një bashkëpunëtor i ngushtë i themeluesit të lëvizjes talebane, do të drejtojë qeverinë e rë të Afganistanit ndërsa Mullah Abdul Ghani Baradar, do të jetë zëvendës kryeministër.
Kabineti i ministrave u shpall këtë të martë dhe bie në sy emri i Sarajuddin Haqqani, djali i themeluesit të rrjetit Haqqani, të përfshirë në listën e organizatave terroriste nga Shtetet e Bashkuara, i cili do të jetë ministri i ri i brendshëm.
Zëdhënësi i Talebanëve Zabihullah Mujahid në një konferencë shtypi në Kabul deklaroi se emërimet janë të përkohëshme. Ndërkohë qindra burra dhe gra marshuan në rrugë për të protestuar kundër kontrollit të talebanëve, të cilët tentuan të shpërndajnë turmat duke qëlluar në ajër me armë zjarri.
Talebanët janë përpjekur vazhdimisht të sigurojnë afganët dhe vendet e huaja se nuk do t’i rikthehen brutalitetit të regjimit të tyre të dy dekadave më parë, të karakterizuar nga ndëshkimet e dhunshme dhe ndalimi i grave dhe vajzave nga jeta publike.
Forcat e huaja të drejtuara nga SHBA evakuuan rreth 124,000 të huaj dhe afganë në rrezik, por rreth 1.000 njerëz, përfshirë amerikanët, kanë ngecur në qytetin verior të Mazar-i-Sharif prej ditësh në pritje të lejes për fluturimet charter që të largohen.
