Besimtarët muslimanë festojnë sot Kurban Bajramin. Kjo është një nga ditët më të rëndësishme për muslimanët në Shqipëri dhe në gjithë botën.
Si zakonisht në vitet e fundit falja e namazit të Kurban Bajramit në Tiranë është bërë në sheshin “Skenderbej”.
Mijëra besimtarë mbushën sheshin ndërsa kreu i komunitetit musliman Bujar Spahiu mbajti fjalën e rastit para të pranishmeve duke uruar të giithë muslimanët në këtë ditë të rëndësishme për ta.
“Kurbani mbjell në shoqëri shpirtin vëllazëror, bashkëpunimin, ndihmesën dhe shpirtin e sakrificës, ndihmon në zhvillimin e barazisë në shoqëri dhe ndikon në kalimin e hendekut midis shtresave të ndryshme shoqërore, duke i nxitur ata drejt bashkëpunimit. Therja e kurbanit dhe ndihma për nevojtarët duke i gëzuar ata, i shërben zgjerimit të drejtësisë shoqërore dhe fuqizimit të dashurisë midis njerëzve. Gjithashtu nga ana tjetër kurbani e mëson njeriun e pasur të japë nga pasuria e tij për të fituar kënaqësinë e Zotit”, deklaroi kreu i komitetit musliman Bujar Spahiu.
Ceremoni të tilla janë zhvilluar në të giitha qytetet e vendit.
