Shqipëria e Panuccit bëri një hap mbrapa ne lojë dhe pa rezultat pasi u mund nga Norvegjia 1 me 0. Miqësorja e luajtur në Elbasan Arena, ishte tepër zhgënjyese pasi nordikët ishin shumë më lart në të gjitha drejtimet duke e dominuar ndeshjen.
Skuadra e trajnerit Lagerbak ishte me e saktë në qarkullimin e topit dhe fitoi thuajse te gjitha duelet në të gjitha repartet ne pjesën e parë përballë një Shqipërie pa ide, apatike dhe me shumë gabime individuale edhe ne mbrojtje.
Për fat të mirë nga gabimet e Ajetit dhe Mavrajt, nordikët nuk shënuan në pjesën e parë ndërsa në një rast vendimtar ishte Strakosha. Mesfusha kuqezi me Qaken dhe Ramadanin çaloi shumë në skemën 4-3-3 ku Sadiku thuajse nuk u doli asnjëherë para portës kundërshtare.
Në pjesën e dytë Panucci ndryshoi për pak minuta skemë duke kaluar Grezden në qendër dhe Sadiku me Balajn që u fut në fushë për të shkuar në 4-3-1-2.
Megjithatë asgjë nuk ndryshoi në lojën e kuqezinjve të cilët qëndruan më së shumti prapa duke pritur ekipin mik në gjysmëfushën e vet.
Vetëm një goditje me kokë e Sadikut në një goditje nga këndi ishte shumë pak për të ndezur motorët e Shqipërisë e cila pasi u shpëtua dy here nga Strakosha, u dorëzua më në fund në të ‘70 kur shtatlarti Rosted shënoi me kokë golin e fitores pas një goditje nga këndi.
Shqipëria u dorëzua para kohe duke bërë pak përpjekje për të barazuar shifrat, madje në fund norvegjezet mund të na kishin ndëshkuar sërish.
Një humbje kjo që na kthen me këmbë në tokë pas paraqitjeve pozitive ne fundin e edicionit të kaluar të eliminatoreve të botërorit si dhe miqësores së fitores në Turqi.
Deri në shtator kur nis liga e kombeve, Panucci ka ende shumë punë për të bërë.
