Zëvendëskryeministri Erjon Braçe reagoi pas operacionit të policisë që arrestoi 115 persona për vijimin e basteve online. Braçe tha në “Facebook” se të tilla aksionesh do të vijojnë dhe se goditja do të jetë edhe më e fortë.
“Kujtuat se ju kishim harruar? 115 në pranga për bastet! 84 ndër ta administratorë. Nga parajsa e miliona lekëve fitim në ditë deri tek ferri 7-15 vite burg. Bastet, bixhozi janë të paligjshëm në këtë vend! Por këta nuk heqin dorë. Nuk mund të rrinë dot pa fitimet që tani janë jo vetëm 100% të paligjshme por edhe 100% të tyre! Grabitja e shqiptarëve të varur nga bixhozi ka vijuar edhe pse shumë më pak. Ndaj duhej goditja e fortë e djeshme! Nuk ka mbaruar, do vijojë! “
Ai kërkoi nga qytetarët që të denoncojnë çdo rast të aktivitetit të paligjshëm të bixhozit.
Operacioni “Fati i lojërave” vuri në pranga mbrëmjen e të enjtes 115 persona. Operacioni u zhvillua në Tiranë, Durrës, Elbasan, Fier, Berat, Korçë, Lezhë dhe Shkodër teksa po luheshin ndeshjet e Europa Leauge. Gjatë aksionit u sekuestruan 172 mln lekë të vjetra.
