Ky 21 janar shënon 14-vjetorin e vrasjes së 4 protestuesve në vitin 2011 në Bulevardin ‘Dëshmorët e Kombit’ në Tiranë.
Në nderim të kujtimit të viktimave, Ziver Veizi, Aleks Nika, Hekuran Deda dhe Faik Myrtajt, së bashku me familjarët e tyre, Kryeparlamentarja Elisa Spiropali, shoqëruar nga Zv.Kryeministrja Belinda Balluku dhe disa ministra vendosen lule në vendet ku protestuesit humbën jetën.
Lexo edhe :
Kreu i qeverisë Edi Rama mungoi në homazhe për shkak të agjendës, ndërsa reagimin mbi ngjarjen e 21-janarit e bëri me një video mesazh.
“Nga dëshira për drejtësi harrojnë se jemi në një sistem kur drejtësinë nuk e bën as kryeminsitri, as qeveria e as partia në pushtet.Kam aq shumë për të thënë sa nuk ua tregoj dot por do të rri besnik qëndrimit për të mos bërë komente duke uruar e dashur të besoj se SPAK nuk do të jetë për shumë kohë I zënë me gjithçka tjetër përveçse 21 janarin, i cili për më tepër është rast i qartë si drita e diellit. Prandaj cdo vit që kalon jo vetëm shtohet barra e turpit mbi këdo që duhet të japë drejtësinë e munguar por njollos dhe vetë reformën në drejtësi duke poshtëruar jo vetëm familjet e dëshmorëve por një popull të tërë që do dhe Meriton drejtësi për 21 janarin. Drejtësia për 21 janarin është drejtësi jo thjesht për një ngjarje të djeshme por të sotmen dhe të nesërmen”, u shpreh Rama.
Homazhet u zhvilluan edhe në fshatin Zenelaj të Gjirokastrës, nga familjarët e Ziver Veizit
“Nuk kërkojmë gjë tjetër, veçse nga organet kompetente, nga SPAK të zbatojë vendimin e Gjykatës së Strasburgut, dhe të vihet drejtësi sa më shpejt për 4 viktimat e 21 janarit”, shprehet për mediat mbesa e Ziver Veizit.
Viktimat atë kohë protestonin para Kryeministrisë, më 21 Janar të 2011-ës kur Partia Socialiste ishte në opozitë ndërsa PD-ja dhe LSI-ja qeverisnin vendin.
“Jam dëshmitar okular, vi këtu çdo vit, duam drejtësi për 4 dëshmorët”.
Shpresa e familjareve të viktimave tashmë është te Prokuroria e Posaçme pas rihapjes së çështjes.
/vizionplus.tv
