Ambasadorët e vendeve anëtare të Bashkimit Europian do të marrin sot pasdite një vendim për miratimin e kuadrit negociues me Shqipërinë.
Në axhendën e takimit pika e fundit është Shqipëria, ndërkohë që bie në sy se mungon kuadri negociues me Maqedoninë e Veriut, e cila është bllokuar nga Bullgaria.
Kuadri negociues është hapi i fundit para se Këshilli Europian të vendosë datën kur zhvillohet Konferenca e Parë Ndërqeveritare BE-Shqipëri.
Dy ditë më parë ambasadorët e BE-së e shtynë vendimin për Shqipërinë dhe Maqedoninë e Veriut, në rastin e Shqipërisë sepse ende nuk janë plotësuar kushtet e vendosura nga shtetet anëtare.
Caktimi i një date për Shqipërinë duket në kufijtë e të pamundurës, por megjithatë në Tiranë po bëhen të gjitha lëvizjet që Gjykata Kushtetuese të plotësohet para datës 11 dhjetor, kur mblidhet Këshilli Europian.