Kryetarja e LSI, Monika Kryemadhi deklaroi se zgjidhja e vetme politike në vend është largimi I kryeministrit Edi Rama nga qeveria.
Në një prononcim për mediat pas takimit të zhvilluar me kreun demokrat në selinë blu, Kryemadhi u shpreh e bindur se më përpara do të zhvillohen zgjedhjet parlamentare se ato lokale.
Drejtuesja e LSI, tha se nuk ka më dialog dhe se opozita kërkon vetëm zgjedhje.
Nuk ka më dialog, tashmë ka zgjedhje të reja, që shkojmë drejt zgjedhjeve. Sepse ne po qëndrojmë këtu edhe e mbajmë gjithë atmosferën politike këtu por po të dilni nëpër rrethe do të shikoni që kanë filluar të hapen zyrat elektorale. Vetë socialistët po përgatiten për të shkuar drejt zgjedhjeve të parakohshme, pavarësisht se bëjnë si të fortë. Por të jeni të bindur që vera do të fillojë me zgjedhje parlamentare, jo me zgjedhje lokale.
Ajo u bëri thirrje qytetarëve që t’i bashkohen opozitës në protestën e 16 marsit me qëllim që, sipas saj, vendit t’i hapet një portë drejt integrimit.
“Dua ti bëj një thirrje të gjithë qytetarëve shqiptarë të marrin pjesë në një tjetër akt vendimtar të hapjes së portave të shpresës, hapjes së portave të Europës, të zgjedhjeve të parakohshme të lira dhe të ndershme pa Edi Ramën, horrat dhe kriminelët e tij. Me një akt tjetër të madh që do të na bashkojë trefish më shumë se me 16 shkurt, me 16 mars në protestën vendimtare për ta përcjellë kufomën politike të sektit kriminal të rilindjes, për të çliruar Shqipërinë, të ardhmen tonë, për të çliruar zgjedhjet, ekonominë, madje për të çliruar dhe vetë PS.”
Drejtuesja e LSi rendit arsyet se perse ata kerkojne largimin e Rames.
Ato që lexojnë ne nga raportet e Departamentit të Shtetit janë shumë të qarta, që vetë Shqipëria është kthyer në lavatriçe parash. Por në fakt janë kthyer edhe vetë bashkitë e së majtës në lavatriçe të parave të pista dhe të korrupsionit. Ndërkohë që njerëzit më thanë, këta po na nxjerrin qelbin se gjaku ka mbaruar. Kështu që njerëzit kanë arritur në atë stad që kanë vetëm helm dhe kanë një urrejtje patologjike ndaj kapjes së shtetit. Sepse kapja e shtetit varfëron njerëzit, mbyll vendet e punës, i kthen shqiptarët në shërbëtorë të drogës, të trafikut dhe të krimit. Dhe ajo çka është më e rëndësishmja ti paguan e paguan taksa pafundësisht dhe asnjëherë nuk ke shërbimin që duhet. Ne paguajmë taksa, por pensionet janë të ulëta. Ne paguajmë taksa, por çmimi i naftës rritet. Ne paguajmë taksa, por rrugë nuk kemi. Ne paguajmë taksa, por energji elektrike nuk kemi. Ne paguajmë taksa, por libra falas nuk kanë fëmijët nëpër shkolla. Ne paguajmë taksa, por shëndetësi fala nëpër spitale nuk kemi. Ne paguajmë taksa, por nuk jemi në Europë. Jemi vetëm nën mburojën e kështjellës së krimit të organizuar. Unë ju falënderoj përsëri për protestën dhe ju jam shumë mirënjohëse.
