Monika Kryemadhi është takuar këtë të shtunë me gratë e njësisë nr.4 në Tiranë.
Kryetarja e LSI-së u shpreh se gratë janë kthyer në shtëpiake, pasi nuk kanë mundësi punësimi.
Ajo nënvizoi se në programin e LSI nuk do të jetë vetëm angazhimi për t’i punësuar gratë dhe vajzat, por edhe shpërblimi me paga të mira.
“Ne po shikojmë që gratë jo vetëm që janë kthyer në shtëpiake, por mundësia e punësimit të tyre është zero, gjë që e kanë të pamundur. Por edhe sikur të rrinë në shtëpi dhe t’iu shërbejnë familjeve të tyre, ato jo vetëm që nuk iu shërbejnë dot familjeve, por e kanë jetën shumë të vështirë. Kështu që ne angazhimin dhe punësimin e gruas e kemi pjesë të programit. Profesor Mondi që do të jetë përfaqësues i LSI-së në Njësinë Numër 4, por është edhe Kryetari i grupit të programit. Punësimi i grave dhe vajzave nuk është thjesht në kuadrin e punësimit, por edhe me një pagë të mirëpaguar, gjë që ne kemi diskutuar dhe është një nga gjërat tona kryesore. Tek kjo njësia gratë ne i kemi zjarr. Dhe në fakt është gjë shumë e mirë dhe në këtë njësi gruaja është e kudogjendur, në çdo aspekt. Ndoshta edhe për shkak të specifikave të veçanta që ka zona, por ndërkohë edhe papunësia e gruas në këtë njësi është shumë e lartë. Sepse vetvetiu është specifikë e zonave si kjo, që është edhe qytet, edhe zonë informale. Ju e patë vetë që erdhëm deri diku, edhe pse jemi shumë afër qytetit, por edhe shumë larg tij, për shkak të mungesës së infrastrukturës por edhe problematikave të tjera. Por një nga gjërat që do theksoja është që ne kemi shansin dhe mundësinë për t’i përfshirë gratë dhe vajzat, pro jo vetëm për të qenë pjesë votuese, por edhe pjesë e hartimit dhe realizimit të politikave”, tha Kryemadhi.
