Kryetarja e Lëvizjes Socialiste për Integrim, Monika Kryemadhi ka deklaruar se është momenti që opozita duhet të marrë përsipër zgjidhjen e krizes politike.
Përmes një deklarate për mediat kryemadhi është shprehur se opozita duhet të lexojë mirë mesazhin e 85% të shqiptarëve që refuzuan kryeministrin Rama.
Sipas Kryemadhit rezultati i zgjedhjeve është pikënisja e një përgjegjësie shumë të madhe, ku ka theksuar se shqiptarët dje shpëtuan veten dhe Shqipërinë nga gremina e monizmi.
“Votimet e djeshme moniste të diktuara nga krimi i organizuar dhe trafiku i drogës u refuzuan nga mbi 85% e shqiptarëve. Edhe pse organizata e partisë Rilindja e KQZ-së ka shkelur mbi 30 herë kodin zgjedhor për votime të paligjshme, të cilat i votojnë vetë, i numërojnë vetë, nuk arritën dot t’i largojnë sikletin dhe djersën kryetarit të Rilindjes. Dita e djeshme në vetvete ishte një dhunim i hapur i Kushtetutës dhe shtetit ligjor, por ishte një tentativë e dështuar e ngritjes së shtetit monist, duke i vënë një emër: shteti monist i krimit. Refuzimi total nga shqiptarët është një sinjal madhor, por është edhe një përgjegjësi tashmë shumë e madhe për të gjithë frontin opozitar, sepse sfidat tona nuk janë vetëm denoncimi i inkriminimit të Edi Ramës apo sensibilizimi i shqiptarëve dhe aq më pak i ndërkombëtarëve. Sot sfidat tona janë shumë të mëdha! Shqiptarët folën qartë dje me mos pjesëmarrjen e tyre masive dhe fjala e tyre tashmë është përgjegjësi e madhe për ne. Opozita e bashkuar me të gjithë faktorët politikë dhe jo politikë duhet të marrë përsipër zgjidhjen e krizës, në të cilën Edi Rama dhe klika e tij kanë futur Shqipërinë. Sot shqiptarët presin nga opozita një Shqipëri që u ofron atyre një shtet dhe sistem të barabartë, i garanton votën e lirë dhe të drejtën e zgjedhjes. Shqiptarët sot presin një ekonomi që u garanton të ardhmen dhe jo t’i asfiksojë ata. Sot shqiptarët presin nga opozita që t’i japë fund vuajtjeve dhe makthit që ata kanë nga pasiguria dhe largimi i fëmijëve të tyre nga vendi. Për ne nuk mjafton që shqiptarët refuzuan regjimin monist të Edi Ramës, por duhet të punojmë fort për të fituar besimin e tyre. Jemi të bindur që shqiptarët refuzuan me forcë çdo gjë të gabuar që është bërë këto vite nën regjimit monist të Edi Ramës. Janë bërë edhe punë shumë të mira. Në këtë vend, zhvillim për shkak të njerëzve punëtorë dhe ekonomisë së tregut, anëtarësimit në NATO, heqja e vizave për shqiptarët e shumë gjëra të tjera që vijnë si rezultat i punës së përbashkët. Por asnjë prej tyre nuk lidhet me qeverisjen moniste të Edi Ramës dhe Rilindjes së tij. Për LSI-në ky rezultat i djeshëm është pikënisja e një përgjegjësie shumë të madhe. Shqiptarët dje shpëtuan veten dhe Shqipërinë nga gremina e monizmit. Prandaj përgjegjësitë tona kalojnë mbi partitë politike. Beteja jonë për Shqipërinë tonë dhe për shqiptarët e fëmijët e shqiptarëve, për të ardhmen e tyre, këtë mision historik do ta çojmë deri në fund. Çdo sakrificë është shumë e vogël përpara këtij misioni të madh. Tashmë fillon beteja përballë zhdukjes njëherë e përgjithmonë të grupeve kriminale dhe të krimit të organizuar. Tashmë aleatë të kësaj beteje nuk janë vetëm aleatë të kësaj partive politike, po aleatë të kësaj beteja janë 85% e shqiptarëve që refuzuan përfundimisht monizmin që kërkon të instalojë Edi Rama me krimin e organizuar.”
