Situata jo e qëndrueshme politike në Kosovë ka ndikuar që Kosova të ketë një progres të kufizuar.
Kështu thuhet në Raportin e Komisionit Evropian për vendet e Ballkanit Perëndimor, ku përmendet situata politike që nga drejtimi i Ramush Haradinajt e deri në qeverinë aktuale të kryeministrit Avdullah Hoti.
Po ashtu mungesa e përparimit vihet re edhe në administratën publike e sistemin gjyqësor që nuk janë shkëputur dot nga ndikimi i politikes. Ndërsa për krimin e organizuar dhe korrupsionin theksohet se Kosova është ende vetëm në hapat e parë.
Për Maqedoninë e Veriut, raporti thekson nevojën për vazhdimin e zbatimit të marrëveshjeve me Greqinë dhe Bullgarinë. Dokumenti nënvizon se Shkupi zyrtar ka vazhduar me zbatimin e reformave të lidhura me BE si dhe ka shtuar përpjekjet për të forcuar demokracinë dhe sundimin e ligjit.
Ndërsa për Serbinë, Raporti shprehet se niveli i korrupsionit mbetet çështje shqetësuese. Në parlamentin e sapoformuar mbizotëron shumica e koalicionit qeverisës dhe mungon një opozitë efektive, ndaj kjo situatë nuk është e favorshme për pluralizmin thotë Komisioni Europian.
Progres raporti evidenton edhe zhvillimin e marrëdhënieve intensive dhe partneritete strategjik me disa vende në gjithë botën, përfshirë Rusinë dhe Kinën. Komisioni Europian përmend edhe zotimin e Presidentit Aleksandër Vuçiç për zhvendosjen e Ambasadës nga Tel Avivi në Jeruzalem korrikun e vitit të ardhshëm.
Ndaj Malit të Zi, progres raporti vendos theksin tek liria e shprehjes si dhe tensionet e mosbesimin mes faktorëve politikë. Ndërsa për Bosnje Hercegovinën nënvizohet se nuk ka shënuar progres në shumë fusha.
