Eksperti i Ekonomisë, Mateo Sapho, në një lidhje direkte me edicionin e lajmeve në “Vizion Plus”, shprehet se qeveria duhet të prezantojë menjëherë veprime konkrete për përballimin e emergjencës energjetike. Ai tregoi se hapi i parë që duhet të ndërmarrë Ministria e Energjisë është ulja e nivelit të burokracisë.
“Sa i përket rritjes së çmimeve, janë ta pamohueshme, varet nga bursat ndërkombëtare. Për shpalljen e emergjencë, nuk më rezulton që vendet e tjera ta kenë shpallur. Më duket më shumë një gjë për të bërë sensacion, sesa veprime konkrete. Qeveria duhet të prezantojë veprime konkrete që do të marrë sa i përket biznesit dhe qytetarit…Në këtë kohë, ne nuk kemi patur një liberalizim të tregut. E thënë ndryshe, në sirtaret e Ministrisë së Energjitikës kanë ngelur me qindra kërkesa për ndërtim të HEC, ku liberalizmi i tregut dhe lejet për ndërtim të këtyre burimeve të reja energjetike, deri më sot nuk janë dhënë. Çfarë duhet të bëjë në mënyrë të drejtpërdrejtë Ministria e Energjitikës është: të ulë nivelin e burokracisë, të hapë sirtaret dhe të shohë kërkesat, të flasë më investitorët në mënyrë që këto nevoja të realizohen sa më shpejt dhe këto investime t’i bëjnë mirë ekonomisë shqiptare. Tregu ka ngelur në favor të pak individëve.”
Spaho parashikon se Shqipëria nuk do të përballet me problematika në sektorin e energjisë deri në fillim të pranverës. Shqetësimi, sipas tij, fillon më pas, nëse privati zgjedh ta shesë energjinë jashtë shtetit, pasi bursa është më e lartë.
“Duhet të flasim pak edhe për menaxhimin. Në 6 mujorin e kaluar, Shqipëria ka prodhuar më shumë energji në raport me vitet e tjera. Energjia është shitur relativisht lirë. Tani po kërkohet që të blihet energji, sot çmimi është dhjetëfish në raport me sa është shitur. Kjo periudhë, sa i përket Shqipërisë, unë nuk parashikoj problematika të veçanta. Sezoni i shirave është duke afruar, muaji tetor dhe nëntor përqendrohen 90 për qind e shirave të vitit. Në këtë aspekt, Shqipëria në vetvete nuk ka një problematikë deri në fillim të pranverës. Çështja është që nëse e mbajmë tregun e hapur, siç privati ka të drejtë ta bëjë, mund të ketë leverdi që ta shesë jashtë shtetit energjinë, sepse bursa jashtë shtetit është më e lartë. Qeveria nuk duhet të humbasë një strategji për rritjen e energjisë elektrike në Shqipëri. Si vend, i kemi të gjitha mundësitë që të prodhojmë energji të pastër në formatet më të ndryshme.”
