Aktiviteti kriminal shqiptar konsiderohet si më i ashpri në skenarin e krimit etnik në Itali, raporton Vizion Plus.
Ky konstatim prezantohet në raportin e dorëzuar në parlament nga Ministri i Brendshëm mbi rezultatet e arritura nga Departamenti i Hetimit Anti-Mafia, ku ndër të tjera theksohet se një karakteristikë tipike e organizatave shqiptare është edhe bashkëpunimi sipas lidhjeve familjare.
“Me kalimin e viteve, krimi shqiptar ka njohur një evolucion të vazhdueshëm dhe është ndër shprehjet më komplekse dhe të artikuluara në skenarin e delikuencës etnike në Itali. Përveç individëve që veprojnë individualisht ose brenda grupeve të rastit, janë të rrënjosura edhe organizatat e strukturuara dhe të qëndrueshme që dallohen për kryerjen e krimeve specifike përgjithësisht kundër pronës. Axhenda e tyre është e ngjashme me atë të mafiave tipike.”
Më tej në raport thuhet se aktiviteti kriminal shqiptar shprehet kryesisht në trafikimin e substancave narkotike, qënieve njerëzore dhe shfrytëzimin e prostitucionit. Ky i fundit në marrëveshje funksionale, në disa raste me organizata të grupeve të tjera etnike.
“Grupet më të strukturuara përdorin lidhjet me grupe homologe me seli në Holandë, Belgjikë, Austri, Gjermani, Mbretërinë e Bashkuar, në Spanjë dhe Francë, por edhe në Amerikën Qendrore dhe Jugore. Për më tepër, këto struktura janë në gjendje të flasin drejtpërdrejt me kontaktet e tyre në Shqipëri veçanërisht për aktivitete kriminale komplekse.”
Në lidhje me trafikimin e drogës, nënvizohet se grupet kriminale shqiptare veprojnë gjerësisht edhe në kontekst europian, kryesisht përmes importimit të drogës kolumbiane drejt Azisë dhe Holandës.
