Kremlini akuzoi NATO- n sot për “inkurajimin” e Ukrainës për të zgjatur konfliktin kundër ushtrisë ruse, mes debatit të ashpër midis aleatëve të Kievit nëse forcat ukrainase mund të godasin tokën ruse me armë perëndimore.
“Vendet anëtare të NATO-s, kryesisht Shtetet e Bashkuara dhe kryeqytetet e tjera evropiane, kanë filluar ditët e fundit një cikël të ri përshkallëzimi”, tha zëdhënësi presidencial rus Dmitry Peskov.
“Ata e bëjnë me qëllim. Dëgjojmë shumë deklarata luftarake. … Ata po e inkurajojnë Ukrainën me të gjitha mjetet e mundshme për të vazhduar këtë luftë të pakuptimtë,” u tha ai gazetarëve në konferencë.
Por, sipas Peskov, “e gjithë kjo do të ketë pasoja të pashmangshme dhe,në analizë përfundimtare, do të jetë në kurriz të interesave të atyre vendeve që kanë marrë rrugën e përshkallëzimit”.
Gjatë javëve të fundit, kryeqytetet e vendeve të aleancës kanë debatuar nëse do të përdorin ose jo në tokën ruse qindra armë të furnizuara në Kiev nga Perëndimi, në këtë rast raketa me rreze të gjatë veprimi.
Sekretari i Përgjithshëm i NATO-s, Jens Stoltenberg, tha se ai është në favor të kësaj, por vendet që mbështesin Ukrainën, si Gjermania, janë shumë më ngurruese, nga frika e një konflikti të drejtpërdrejtë me Moskën.
Presidenti francez Emmanuel Macron tha dje gjatë vizitës së tij në Gjermani, se aleatët e Kievit duhet të lejojnë ushtrinë ukrainase të “neutralizojë” bazat ushtarake nga ku Rusia lëshon raketat e saj./vizionplus.tv/
