Një foshnjë me dy gjini ka lindur këtë të mërkurë në Qendrën Klinike Universitare të Kosovës në Prishtinë.
Drejtori i Neonatologjisë në QKUK, Xhevdet Gojnovci, deklaroi para mediave se foshnja po mbahet në përkujdesje intensive, ndërsa pohoi se ky është rasti i dyti që ndodhë brenda këtij viti në Kosovë.
Gojnovci tha se foshnja ka lindur para kohe dhe peshon 995 gram.
“Është duke u trajtuar si sindroma hiperplazike e lindur e gjëndrës mbiveshkore. Në këto momente janë marrë analizat dhe janë duke u bërë konsultat e nevojshme me mjekë specialistë nga klinika e Radiologjisë, Kirurgjisë së Fëmijëve, specialistë nga gjenetika dhe specialistë nga Klinika e Pediatrisë gjegjësisht endokrinologu”, tha Gojnovci.
Gojnovci shpjegoi më tutje se kjo sindromë ka ndryshime gjenetike kromozomale për këtë shkak kanë thirrur mjekë specialistë për këtë çështje.
“Nëse vërtetohet kjo sindromë atëherë me terapi, sipas të gjitha gjasave do të shkojë mirë deri në shërim”, tha ai.
