Kosova me regjim të ri izolimi/ Mbyllje në 19:00 dhe ndarje e komunave në bazë të rrezikut
Nga kjo e premte Kosova do të zbatojë një regjim të ri të masave për parandalimin e përhapjes së covid 19.
Komunat janë ndarë në tre kategori sipas shkallës së rrezikut dhe zonat e kuqe do të futen në karantinë nga ora shtatë e mbrëmjes deri në pesë të mëngjesit.
Kryeministri Avdullah Hoti u shpreh optimist se pas dy javësh, situata epidemiologjike në vend do të përmirësohet.
Kreu i ekzekutivit kërkoi vigjilencë dhe përgjegjshmëri për të shmangur një mbylje të dytë në nivel kombëtar.
Ndërkohë bizneset nuk i kanë mirëpritur masat e reja ndërsa shprehen të revoltuar edhe për vonesën e miratimit të planit të rimëkëmbjes.
BERAT RUKIQI
KRYETAR I DHOMAVE EKONOMIKE, KOSOVE
“Ekonomia mbetet e hapur vetëm për mbijetesë. Parlamenti dështoi sërish në miratimin e planit të rimëkëmbjes, papërgjegjshmëri absolute në mesin e një krize të tillë. ”
Edhe Greqia fqinje, nga kjo e premte do të zbatojë karantinën e pjesëshme në të gjithë vendin, nga ora nëntë e mbrëmjes deri në pesë të mëngjesit.
