Koreja e Veriut ka lëshuar sot një raketë balistike drejt detit mes Gadishullit Korean dhe Japonisë, duke bërë që qeveria në Tokio të urdhërojë banorët e një ishulli të futen në vendstrehime për t’u mbrojtur.
Prova më e fundit me raketa nga Koreja e Veriut, erdhi disa ditë pasi udhëheqësi i saj Kim Jong Un u zotua të rrisë arsenalin bërthamor në mënyra më “praktike dhe ofensive”.
Sipas ushtrisë së Koresë së Jugut raketa e fundit mund të ketë qenë me lëndë djegëse të ngurta, një teknologji që ka qenë prej kohësh një objektiv i programeve ushtarake të Kim Jong Un.
Shtetet e Bashkuara “dënuan fuqishëm” Korenë e Veriut për atë që Shtëpia e Bardhë e përshkroi si testimin e një “rakete balistike me rreze të gjatë”, duke akuzuar Phenianin për ndezjen e tensioneve rajonale.
“Presidenti Joe Biden dhe ekipi i tij i sigurisë kombëtare po vlerësojnë situatën në koordinim të ngushtë me aleatët tanë. Nisja e raketës ishte një shkelje e hapur e rezolutave të shumta të Këshillit të Sigurimit të Kombeve të Bashkuara dhe kërcënon të destabilizojë situatën e sigurisë në rajon”, ka deklaruar zëdhënësja e Këshillit të Sigurisë Kombëtare Adrienne Watson.