Koreja e Veriut ka dërguar rreth 10,000 trupa për t’u trajnuar në Rusi, tha Pentagoni të hënën, ndërsa NATO dhe BE shprehën shqetësimin për një përshkallëzim të rrezikshëm të konfliktit.
Moska dhe Pheniani e kanë rritur bashkëpunimin e tyre ushtarak që nga pushtimi rus i Ukrainës në shkurt 2022, por përfshirja e trupave të Koresë së Veriut në luftime do të ishte një ndryshim i rëndësishëm.
“Ne besojmë se Republika Popullore Demokratike e Koresë ka dërguar afërsisht 10,000 trupa për t’u trajnuar në Rusinë lindore”, e cila “ka gjasa” të rezultojë në “përforcim të forcave ruse pranë Ukrainës në javët e ardhshme”, tha zëvendës-zëdhënësja e Pentagonit .”Një pjesë e këtyre ushtarëve janë afruar tashmë Ukrainës”, shtoi ai.
Presidenti i Koresë së Jugut, Yoon Suk-yeol reagoi ndaj njoftimit të Pentagonit duke denoncuar bashkëpunimin e paligjshëm ushtarak midis Rusisë dhe Koresë së Veriut, theksoi se kjo situatë përbën një kërcënim serioz për sigurinë e botës.
Gjeneralët e Koresë së Veriut gjithashtu mund të lëvizin në frontin ukrainas, vlerësoi sot një ligjvënës koreano-jugor, duke cituar shërbimet e inteligjencës së vendit të tij.
Nga ana e tij, presidenti amerikan Joe Biden e përshkroi dislokimin e ushtarëve të Koresë së Veriut në Rusi si shumë të rrezikshëm.
Shtetet e Bashkuara të Amerikës informuan gjithashtu Pekinin për këtë, duke theksuar se Kina duhet të shqetësohet për veprimet destabilizuese të dy fqinjëve të saj, Rusisë dhe Koresë së Veriut, siç tha Matthew Miller, zëdhënës i Departamentit të Shtetit./vizionplus.tv
