Shtimi i vazhdueshëm i shtetasve shqiptarë që hyjnë në vendin tonë nga pika e kalimit kufitar të Kapshticës dhe të Qafë Thanës, ka detyruar Drejtorinë vendore të Policisë së Korcës për t’u vënë në kërkim të hotelit të pestë në këtë qark që do të shërbejë si vend karantinimi për këta emigrantë.
Vetëm një ditë më parë kanë hyrë 22 shtetas shqiptarë nga pika e kalimit kufitar të Kapshticës që lidh Shqipërinë me Greqinë dhe 11 të tjetër nga Qafë Thanë, si pikë kalimi mes Shqipërisë dhe Maqedonisë së Veriut. Shifër që duket se tejkalon kapacitetet akomoduese të hotelit të katërt që ndodhet në Pogradec dhe sjell nevojën e hapjes së një tjetër hoteli që do të shërbejë si vend izolimi.
Nga ana tjetër, prefekti i Qarkut të Korcës, Dhori Spirollari ka kërkuar ndihmën e bashkive dhe donatorëve për të ndihmuar me ushqime të gjithë shtetasit që janë të detyruar të karantinohen në hotele për 14 ditë.
Bashkia e Maliqit ka qënë e para që i është përgjigjur thirrjes së bërë nga prefekti duke venë në dispozicion të emigrantëve një sasi të konsiderueshme patatesh. Nuk dihet ende nëse emigrantët e strehuar në hotelet e Korcës dhe Pogradecit do të përfitojnë nga vendimi i qeverisë shqiptare për të mbuluar një pjesë të shpenzimeve të ushqimit, ndërkohë që shumë prej emigrantëve të karantinuar kanë shfaqur pamundësinë financiare për të përballuar shpenzimet hotelerike dhe ato të ushqimit.
