Trafikimi i emigrantëve është shndërruar në problem serioz në juglindje të vendit. Thuajse çdo ditë, policia godet raste dhe prangos qytetarë që u premtojnë klandestinëve kalim drejt vendeve të BE.
Edhe këtë të dielë, Policia e Korçës arrestoi 25-vjeçarin Renato Çela. I riu po udhëtonte me furgon, brenda të cilit kishte futur 30 emigrantë, kur ju kërkua nga efektivët të ndalonte.
I frikësuar, Renato Çela nuk ju bind urdhrit dhe braktisi mjetin në afërsi të fshatit Zëmblak të Maliqit. Blutë e Korçës gjetën brenda mjetit klandestinët, ndërsa pak minuta më vonë arrestuan 25-vjeçarin.
